Thokur Parish History

ಕೊಡ್ಯಾಳ್ ಥಾವ್ನ್ ಸುಮಾರ್ 10 ಕಿ.ಮೀ ಪಯ್ಸ್ ತಶೆಂಚ್ ಬಜ್ಪೆ ಥಾವ್ನ್ 10.7 ಕಿ.ಮೀ ಬಿತರ್ ನೈಸರ್ಗಿಕ್ ಪ್ರಕೃತೆಚ್ಯಾ ಮ್ಹದೆಂ ಗುರ್ಪುರ್ ನಂಯ್ಚ್ಯಾ ತಡಿರ್ ತೋಕುರ್ ಮ್ಹಳ್ಯಾ ಗಾವಾಂತ್ ಸಾಂತ್ ಸೆಬೆಸ್ತ್ಯಾಂವಾಂಕ್ ಸಮರ್ಪಿಲ್ಲಿ  ತೋಕುರ್ ಫಿರ್ಗಜ್ ಅಸಾ.

ಇತಿಹಾಸ್

ಮಂಗ್ಳುರ್ ಧರ್ಮ್ ಪ್ರಾಂತಾಚ್ಯಾ ಪುರಾತನ್ ಫಿರ್ಗಜಾಂ ಭಿತರ್ ಏಕ್ ಜಾವ್ನಾಸ್ಚಿ ಸಾಂ ಜುಜೆಚಿ ಫಿರ್ಗಜ್ ಪೆಜಾರ್ ವಾರಾಡ್ಯಾಂತ್ ಟಿಪ್ಪುಚ್ಯಾ ಕಾಳಾರ್ ಆಸ್ಲಿ ಹಿ ಏಕ್ ಚ್ ಫಿರ್ಗಜ್ ಜಾವ್ನಾಸೊನ್ ಬಜ್ಪೆ, ಸುರತ್ಕಲ್ ಆನಿ ಫೆರಾರ್ ಫಿರ್ಗಂಜೆಂಚಿ ಮಾಂಯ್ ಫಿರ್ಗಜ್ ಜಾವ್ನಾಸಾ. ವೆಳಾಕಾಳಾಕ್ ಸರಿ ಜಾವ್ನ್ ಕ್ರೀಸ್ತಾಂವ್ ಲೋಕ್ ಚಡೊನ್ ಯೆತಾನಾ ಫಿರ್ಗಜೆಂಚೊ ಸಂಖೊ ಚಡೊನ್ ಆಯ್ಲೊ. ತವಳ್ ಪೆಜಾರ್ ವಾರಾಡ್ಯಾಂತ್ 9 ಫಿರ್ಗಜೊ ಆಸ್ ಲ್ಲ್ಯೊ ತವಳ್ ತೋಕುರ್ ಆನಿ ಕೆಂಜಾರ್ ಗ್ರಾಮಾಚೊ ಲೋಕ್ ಪೆಜಾರ್ ಇಗರ್ಜೆ ಥಾವ್ನ್ 4 ಮೈಲಾ ಪಯ್ಸ್ ಆಸ್ಲ್ಲ್ಯಾನ್ ತಾಂಕಾ ಆಯ್ತಾರಾಚೆಂ ಮಿಸಾಕ್ ಹಾಜರ್ ಜಾಂವ್ಕ್ ಆನಿಂ ತಶೆಂಚ್ ತಾಂಚ್ಯೊ ಆತ್ಮೀಕ್ ಗರ್ಜೊ ಸುದಾರ್ಸುಂಕ್  ಭೋವ್ ಕಷ್ಟ್ ಮಾರ್ತಾಲೆ. ಹಾಂಗಾಸರ್ ಆಸ್ಲಿ ಶೆಂಬೊರಾ ವಯ್ರ್ ಕುಟ್ಮಾಂ ಮರವೂರ್ ಆನಿ ಕೂಳೂರ್ ಮದೆಂ ನಂಯ್ಚ್ಯಾ ತಡಿರ್ ಆಸ್ ಲ್ಲ್ಯಾನ್ ಪಾವ್ಸಿಲ್ಯಾ ತೀನ್ ಮಹಿನ್ಯಾನಿಂ ಆವ್ರ್ ಬರ್ಚ್ಯಾ ವೆಳಾರ್ ಉದ್ಕಾಂತ್ಲ್ಯಾನ್ ಮಿಸಾಕ್ ವೆಚೆ ತಶೆಂಚ್ ಲ್ಹಾನ್ ಭುರ್ಗ್ಯಾಂಕ್ ಇಸ್ಕೊಲಾಕ್ ವೆಚೆ ಭೋವ್ ಚಡ್ ಆಪಾಯಾಚೆ ಜಾವ್ನಾಸ್ ಲ್ಲೆಂ ತ್ಯಾ ದೆಕುನ್ ತೋಕುರ್ ಆನಿ ಕೆಂಜಾರ್ಚಾ ಲೋಕಾಂಚ್ಯೊ ಆತ್ಮೀಕ್ ಗರ್ಜೆಕ್ ಪಾವೊಂಕ್ ಏಕ್ ನವ್ಯಾ ದೇವ್ ಮಂದಿರಾಚಿಂ ತಶೆಂಚ್ ಇಸ್ಕಾಲಾಚಿ ಗರ್ಜ್ ದಿಸೊನ್ ಆಯ್ಲಿ ತ್ಯಾ ದೆಕುನ್ ಲ್ಹಾನಾ ಭುರ್ಗ್ಯಾಂಕ್ ಶಿಕಪ್ ದೀಂವ್ಚ್ಯಾ ಉದ್ದೇಶಾನ್ 1921 ಇಸ್ವೆಂತ್ ತೋಕುರ್ ಸಾಂತ್ ಅಂತೋನಿಚ್ಯಾ ಅಸ್ರ್ಯಾಖಾಲ್  ಪೆಜಾರ್ಚೊ ತವಳ್ಚೊ ವಿಗಾರ್ ದೆವಾದಿನ್ ಗ್ರೆಗೊರ್ ಸೊಜ್ ಬಾಪಾನ್ (1919-1937) ದುಸ್ರ್ಯಾ ವಾಡ್ಯಾಚ್ಯಾ ಪೌಲ್ ಬೊಸ್ತ್ಯಾಂವ್ ವೇಗಸಾನ್ ದಾನ್ ಜಾವ್ನ್ ದಿಲ್ಲ್ಯಾ ಜಾಗ್ಯಾರ್ ಚೊವ್ತಿ ಕ್ಲಾಸ್ ಪರ್ಯಾಂತ್ ಎಲಿಮೆಂಟರಿ ಇಸ್ಕೂಲ್ ಆರಂಭ್ ಕೆಲೆಂ. ಉಪ್ರಾಂತ್ಲೊ ವಿಗಾರ್ ಮಾನಾದಿಕ್ ಮಾನ್ವೆಲ್ ರೆಬೆಲ್ ಬಾಪ್ (1937-38) ಇಸ್ಕಾಲಾಚ್ಯಾ ಅಭಿವೃದ್ದೆ ಖಾತಿರ್ ವಾವುರ್ಲೊ. ಲ್ಹಾನ್ ಭುರ್ಗ್ಯಾಂಕ್ ಶಿಕಪ್ ದೀಂವ್ಕ್ ಇಸ್ಕಾಲ್ ಸ್ಥಾಪನ್ ಕೆಲ್ಲೆಂ ಜಾಲ್ಯಾರೀ ಅತ್ಮೀಕ್ ಗರ್ಜಾಂ ಖಾತಿರ್  ಮಾನಾದಿಕ್ ಶಾಬಸ್ ಫೆರ್ನಾಂದ್ ಬಾಪಾನ್ (1938-1942) ವರ್ಸಾಚ್ಯಾ ಥೊಡ್ಯಾ  ಫೆಸ್ತಾಚ್ಯಾ ದಿಸಾನಿಂ ಇಗರ್ಜೆಕ್ ಮಿಸಾಕ್ ಯೇಂವ್ಕ್ ತಾಂಕಾನಾತ್ ಲ್ಲ್ಯಾ ಪ್ರಾಯ್ವಂತಾಂ ಖಾತಿರ್ ಇಸ್ಕೊಲಾಂತ್ ಮೀಸ್ ಆಸಾ ಕೆಲೆಂ. ಉಪ್ರಾಂತ್ ಆಯಿಲ್ಲೊ ಮರಿಯಾಣ್ ಪೆರ್ನಾಂದ್ ಬಾಪಾನ್ (1942-1965) ಹೆಂ ಮುಂದರುನ್ ವೆಲೆಂ. ಜೋನ್ ಜಿ ಪೀಂತ್ ಬಾಪಾಂಚೊ ಸಹಾಯಕ್ ವಿಗಾರ್ ಜಾವ್ನಾಸ್ ಲ್ಲೊ ಮಾನಾದಿಕ್ ಸೈಮನ್ ಸೋಜ್ ಬಾಪಾನ್ ಮಹಿನ್ಯಾಂತ್ ಏಕ್ ಪಾವ್ಟಿಂ ಸಾಂಜೆಚೆ ಮೀಸ್ ಬೆಟವ್ನ್ ಪೆಜಾರ್ ಇಗರ್ಜೆಕ್ ಮಿಸಾಕ್ ಯೇಂವ್ಕ್ ಜಾಯ್ನಾಸ್ಲ್ಯಾಂಕ್ ಮಿಸಾಚೊ ಕಾಯ್ದೊ ಪಾಳುಂಕ್ ಕುಮೊಕ್ ಕೆಲೆಂ.ಉಪ್ರಾಂತ್ಲೆ ಪೆಜಾರ್ ಫಿರ್ಗಜೆಚೆ ವಿಗಾರ್ ಜಾವ್ನಾಸ್ಲ್ಲ್ಯಾ ಮಾ|ಬಾ ಮಾರ್ಕ್ ವಾಸ್ (1963-1970) ಆನಿ ಮಾ| ಬಾ ವಲೇರಿಯನ್ ಕುಲಾಸೊ  (1970-1973) ಹಾಂಚ್ಯಾ ಕಾಳಾರಿ  ಮಹಿನ್ಯಾಂತ್ ಏಕ್ ಪಾವ್ಟಿ ಸಂದ್ರಾಪಾ ಪರ್ಮಾಣೆಂ ಸಾಂಜೆಚ್ಯಾ ಮಿಸಾಚಿ ಮೊಂಡವಳ್ ಮುಂದರುನ್ ವೆಲಿ. ಹಾಂಚೆ ಉಪ್ರಾಂತ್ ಆಯಿಲ್ಲ್ಯಾ ವಿಗಾರ್ ಮಾನಾದಿಕ್ ಲೂವಿಸ್ ಸೋಜ್ ಬಾಪಾನ್ (1973 -1982) ಮಹಿನ್ಯಾಂತ್ ದೋನ್ ಪಾವ್ಟಿಂ ಮೀಸಾಚೆ ಬಲಿದಾನ್ ಬೆಟಂವ್ನ್ ಮಿಸಾಚೊ ಕಾಯ್ದೊೆ ಪಾಳುಂಕ್ ಮಾಂಡಾವಳ್ ಘಾಲಿ ಬಾಪ್ ಲೂವಿಸ್ ಸೋಜ್ ಕಿನ್ನಿಗೋಳಿ  ವರ್ಗ್ ಜಾವ್ನ್ ವೆಚ್ಯಾ ವೆಳಾರ್ ಪೆಜಾರ್ ಫಿರ್ಗಜೆಚೊ ವಿಗಾರ್ ಜಾವ್ನ್ ಮಾನಾದಿಕ್ ನೋರ್ಬರ್ಟ್ ಸೋಜ್ ಬಾಪಾನಿಂ 1982 ಮೇ 26 ವೆರ್ ಹುದ್ದೊ ಸ್ವೀಕಾರ್ ಕೆಲೊ. ಇಸ್ಕೊಲಾಂತ್ ಮ್ಹಹಿನ್ಯಾಂತ್ ದೋನ್ ಪಾವ್ಟಿಂ ಆಸ್ಲೆ ಮಿಸಾಚೆ ಬಲಿದಾನ್ ಚಾಲು ದವರ್ಲೆಂ ಮಾತ್ರ್ ನ್ಹಂಯ್ ಆಸ್ತಾ ಸಾಕಾಳಿಚೆಂ ಮೀಸಾಚೆ ಬಲಿದಾನ್ ಬೆಟಂವ್ಕ್ ಸವ್ಲತ್ ಕರ್ನ್ ದಿಲಿ.

ಪೆಜಾರ್ ಫಿರ್ಗಜೆಂತ್ ಆಯ್ತಾರಾಚೆಂ 2 ಮೀಸಾಂ ಆಸ್ಲಿ ದೆಕುನ್ ಇಜೈಚ್ಯಾ ಸಾಂತ್ ಅನ್ನಾ ಪ್ರಯಾರಿಚ್ಯಾ ಪ್ರಾದಾನಿಂ  ತೋಕುರ್ ಇಸ್ಕಾಲಾಂತ್ ಮಿಸಾಚೆಂ ಬಲಿದಾನ್ ಬೆಟಂವ್ಕ್ ತಶೆಂಚ್ ಹಾಂಗಾಚ್ಯಾ ಲೋಕಾಚಿಂ ಆತ್ಮೀಕ್ ಸೆವಾ ಕರುಂಕ್ ನಿರ್ಣಯ್ ಘೆತ್ಲೊ ಜಾಲ್ಯಾರೀ ಹಾಂಗಾಸರ್ ಆಸ್ಚ್ಯಾ  ಪಿಡೆಸ್ತಾಂಕ್ ಆನಿಂ ಪ್ರಾಯ್ವಂತಾಕ್ ಆಯ್ತಾರಾ ಮಿಸಾಂತ್ ಭಾಗ್ ಘೆಂವ್ಕ್ ಅವ್ಕಾಸ್ ನಾತ್ಲ್ಯಾ ನಿಮ್ತಿಂ ಹಾಂಗಾಸರ್ ಜಿಯೆಂವ್ಚ್ಯಾ 120 ಕುಟ್ಮಾಂ ಖಾತಿರ್ ತೋಕುರ್ ಇಸ್ಕೂಲಾಚ್ಯಾ ಲಾಗಿಂಚ್ ಏಕ್ ಕೊಪೆಲ್ ಬಾಂದ್ಚಿ 25 ವರ್ಸಾಂ ಥಾವ್ನ್ ಆಸ್ಲಿ ಆಶಾ ಆನಿಂ ಸ್ವಪಣ್ ಜ್ಯಾರಿ ಕರ್ಚಾ ಖಾತಿರ್ ತವಳ್ಚೊ ಮಂಗ್ಳುರ್ಚೊ ಅದಿಕ್ ಮಾನಾದಿಕ್ ದೊತೊರ್ ಬಾಜಿಲ್ ಸೋಜ್ ಹಾಂಚ್ಯಾ ಅನುಮತೆನ್ ಆನಿಂ ಲೋಕಾಂಚ್ಯಾ ಸಹಕಾರಾನ್ ಪಯ್ಲ್ಯಾ ವಾಡ್ಯಾಚ್ಯಾ ಶ್ರೀ ಫ್ರೆಡರಿಕ್ ಫೆರಾವೊ ಆನಿ ದುಸ್ರ್ಯಾ ವಾಡ್ಯಾಚ್ಯಾ ಶ್ರೀ ದೋಮಿಂಗ್ ರೊಸಾರಿಯೊನ್ ದಾನ್ ಜಾವ್ನ್ ದಿಲ್ಲ್ಯಾ ಜಾಗ್ಯಾರ್ ಸಾಡೆ ತೀನ್ ಲಾಖ್ ಖರ್ಸಾರ್ ಏಕ್ ದೇವ್ ಮಂದಿರ್ ಉಬಾರ್ಚೆ ಕಾಮ್ ವಿಗಾರ್ ಬಾಪ್ ನೋರ್ಬರ್ಟ್ ಸೋಜ್ ಹಾಣಿಂ ಹಾತಿಂ ಘೆತ್ಲೆಂ. ಆನಿಂ ಹಾಂಗಾಚ್ಯಾ ಲೊಕಾಚ್ಯಾಂ ಖುಶೆ ಪರ್ಮಾಣೆಂ  ಸಾಂ ಬೊಸ್ತ್ಯಾಂವಾಕ್ ಸಮರ್ಪುಣ್ ದೀಂವ್ಕ್ ಗೊವ್ಳಿ ಬಾಪಾಂನಿ ಅನುಮತಿ ದಿಲಿ. ವಿಗಾರ್ ಜೆರಾಲ್ ಜಾವ್ನಾಸ್ಲ್ಯಾ ಅಧಿಕ್ ಮಾನಾದಿಕ್ ಮುನ್ಸಿಂಜೂರ್ ಲೂವಿಸ್ ಸೋಜ್ ಬಾಪಾನ್ 1982 ಎಪ್ರಿಲ್ 22 ವೆರ್ ಹ್ಯಾ ಕೊಪೆಲಾಕ್ ಬುನ್ಯಾದಿ ಪಾತೊರ್ ಬೆಂಜಾರ್ ಕರ್ನ್ ದವರ್ಲೊ. ಹೆಂ ದೇವ್ ಕೊಪೆಲ್ ಉಬಾರ್ಚಾಕ್ ಪೆಜಾರ್ ಫಿರ್ಗಜೆನ್ ಅಪ್ಲ್ಯಾ ಭಂಡಾರಾಂತ್ಲೊ ಏಕ್ ಲಾಕ್ ತೇರಾ ಹಜಾರ್ ರುಪಯ್ ತಶೆಂಚ್ ಇತರ್ ಧರ್ಮಿಷ್ಟಾಂನಿಂ ಕುಮೊಕ್ ಕೆಲ್ಯಾ ಮಾತ್ರ್ ನ್ಹಂಯ್ ವಿಗಾರ್ ಬಾಪಾ ಸಂಗಿಂ ತವಳ್ ಪೆಜಾರ್ ಫಿರ್ಗಜೆಚೊ ಲಾಯಿಕ್ ಆಡಳ್ತೆದಾರ್ ಶ್ರೀ ಜೋಸೆಪ್ ಅಲ್ಬುಕರ್ಕ್ ಆನಿಂ ಸಬಾರಾನಿಂ ವಿಶೇಷ್ ವಾಂವ್ಟ್ ಆನಿ ಮಿನತ್ ಕಾಡ್ಲ್ಯಾ.

ಸಾಂತ್ ಅಂತೋನ್ ಇಸ್ಕಾಲಾಚೆ ಮುಖೆಲ್ ಮೇಸ್ತ್ರಿ  ರೈನಿ ಫೆರಾವೊ ಆನಿಂ ಪಯ್ಲ್ಯಾ ವಾಡ್ಯಾಚೊ ಗುರ್ಕಾರ್ ಪೆರಿಗ್ರಿನ್ ಸೋಜ್, ದುಸ್ರ್ಯಾ ವಾಡ್ಯಾಚೊ ಗುರ್ಕಾರ್ ಶ್ರೀ ಪ್ರೇಂಕಿ ವೇಗಸ್ ತಶೆಂಚ್ ತಿಸ್ರ್ಯಾ ವಾಡ್ಯಾಚೊ ಗುರ್ಕಾರ್ ಶ್ರೀ ಜೆರೊಮ್ ಸೋಜ್ ಹಾಂಚ್ಯಾ ಮುಕೆಲ್ಪಣಾರ್ ತೀನೀ ವಾಡ್ಯಾಚ್ಯಾ ಲೊಕಾನಿಂ ಜಾಯ್ತೊ ವಾವ್ರ್ ಕೆಲಾ. ಅಶೆಂ ಸಾಂ ಸೆಬೆಸ್ತ್ಯಾವಾಂಕ್ ಸಮರ್ಪಿಲ್ಲೆ ಹೆಂ ತೋಕುರ್ಚೆ ದೇವ್ ಮಂದಿರ್ ಮಾನಾದಿಕ್ ನೋಬರ್ಟ್ ಸೋಜ್ ಬಾಪಾಂಚ್ಯಾ ವಾಂವ್ವಿಚೊ ಆನಿ ಮಿನತೆಚೊ ಫಳ್ ಜಾವ್ನ್ ತೋಕುರ್ ಆನಿ ಕೆಂಜಾರ್ ಕ್ರೀಸ್ತಾಂವ್ ಪರ್ಜೆಚಾ ಸಹಕಾರಾನ್ ಆನಿ ಕುಮ್ಕೆನ್ ತಶೆಂಚ್ ಪೆಜಾರ್ ದೇವ್ ಪ್ರಜೆಚಾ ಆದಾರಾನ್  ಮಂಗ್ಳುರ್ ಧರ್ಮ್ ಪ್ರಾಂತಾಚ್ಯಾ ಅನುಮತೆನ್ ಆನಿಂ ಫಿರ್ಗಜೆ ಬಾಯ್ಲ್ಯಾ ಸಬಾರಾಂಚ್ಯಾ ಉದಾರ್ ಮೊನಾಚ್ಯಾ ಕುಮ್ಕೆ ಸಂಗಿಂ ಉಬಾರ್ ಲ್ಲೆಂ ಹೆಂ ಕೊಪೆಲ್ 1989  ಮೇ ಮಹಿನ್ಯಾಚ್ಯಾ 10 ತಾರಿಕೆರ್ ಮಂಗ್ಳುರ್ಚೊ ಗೊವ್ಳಿ ಬಾಪ್ ಅಧಿಕ್ ಮಾನಾದಿಕ್ ದೊತೊರ್ ಬಾಜಿಲ್ ಸಾಲ್ವಾದೊರ್ ಸೋಜಾನಿಂ ಆಶಿರ್ವದಿತ್ ಕರ್ನ್ ಸಾಂ ಬೊಸ್ತ್ಯಾಂವಾಂಕ್ ಸಮರ್ಪುನ್ ದಿಲೆಂ. 1989 ಮೇ 28 ವೆರ್ ಬಾಪ್ ನೋರ್ಬಟ್ ಹಾಂಕಾ ಆಂಜೆಲೂರ್ ಫಿರ್ಗಜೆಕ್ ವರ್ಗ್ ಜಾತಸ್ ಬಾಪ್ ಮೌರಿಸ್ ಸೋಜ್ ಪೆಜಾರ್ ಫಿರ್ಗಜೆಚೆ ವಿಗಾರ್ ಜಾವ್ನ್ ನೇಮಕ್ ಜಾಲೆ. ತೆದಾಳಾ ಪಾವ್ಸಾಚೊ ವೇಳ್ ಜಾಲ್ಲ್ಯಾನ್ ತೋಕುರಾಂತ್ ಮೀಸ್ ನಾತ್ ಲ್ಲೆಂ. ತ್ಯಾ ಶಿವಾಯ್ ವರ್ಸಾಂ ಮದೆಂ 15 ದಿಸಾಂಕ್ ಏಕ್ ಪಾವ್ಟಿಂ ಕಾರ್ಮೆಲಿತ್ ಯಾ ಕಾಪುಚಿನ್ ಪ್ರಾದ್ ಯೇವ್ನ್ ಮೀಸ್ ಬೆಟಯ್ತಾಲೆ. ಮಹಿನ್ಯಾಚಾ ಪಯ್ಲ್ಯಾ ಅಯ್ತಾರಾ ಪುಣಿಂ ತೋಕುರ್ಚ್ಯಾ ಲೋಕಾನಿಂ ಪೆಜಾರ್ ಇಗರ್ಜೆಕ್ ಮಿಸಾಕ್ ಯೇಜೆ ಮ್ಹಳ್ಯಾ ಉದ್ದೇಶನ್ ಮಹಿನ್ಯಾಚೊ ಪಯ್ಲೊ ಆಯ್ತಾರ್ ಸೊಡ್ನ್ ಉರ್ಲ್ಯಾ ಆಯ್ತಾರಾನಿಂ ಮಿಸಾಚೆ ಬಲಿದಾನ್ ತೋಕುರಾಂತ್ ಚಲವ್ನ್ ವೆಲೆಂ. ತೋಕುರಾಂತ್ ಕೊಪೆಲ್ ಜಾಲೆಂ ತರೀ ಚಡಿತ್ ಸವ್ಲತಯೊ ನಾತ್ಲ್ಯೊ ದೆಕುನ್ ಬಾಪ್ ಮೌರಿಸ್ ಹಾಣಿಂ ಸೌಂಡ್ ಸಿಸ್ಟಮ್ ವ್ಯವಸ್ಥಾ ಕೆಲಿ. ಇಗರ್ಜೆಂತ್ ಘಾಂಟ್ ನಾತ್ಲೆ ವರ್ವಿ ಘಾಂಟಿಚಾ ತೋರಿರ್ ಹೋರ್ನ್ ಘಾಲ್ನ್ ಲೋಕಾನಿಂ ವೆಳಾರ್ ಮಿಸಾಕ್ ಯೇಂವ್ಚೆ ಖಾತಿರ್ ಮಿಸಾಚ್ಯಾ ಅರ್ದ್ಯಾ ವೊರಾ ಪುಡೆಂ ಕಂತಾರಾ ಘಾಲ್ನ್ ಮಿಸಾಕ್ ಯೇಂವ್ಕ್ ಲೊಕಾಂಕ್ ಜಾಗ್ರಣ್ ಕರ್ಚೆ ಪ್ರಯತ್ನ್ ಕೆಲೆಂ. ಲೋಕಾಂಕ್ ಬಸೋಂಕ್ ಬಾಂಕ್ ನಾತ್ಲೆ ದೆಕುನ್ ಸನ್ವಾರಾ ಇಸ್ಕೊಲಾ ಥಾವ್ನ್  ಬಾಂಕ್ ಹಾಡ್ನ್ ವಾಪಾರುಂಕ್ ಆರಂಭ್ ಕೆಲೆ. ಪುಣ್ ಪೆಜಾರ್ ವಿಗಾರ್ ಬಾಪಾನಿಂ ತೋಕುರ್ ಇಗರ್ಜೆ ಪಾಸತ್ ಪೂಣ್ಸಾಚೆ ವಣ್ಕುಂಚೆ ಬಾಂಕ್ ಕರಯ್ಲೆ. ಉದಾರ್ ಮೊನಾಚ್ಯಾ ದಾನಿಂನಿ ಥೊಡೊ ಐವಜ್ ದಾನ್ ದಿಲ್ಲೊ ಮಾತ್ರ್ ನಂಯ್ ಮಿಸಾಚಿ ಮುಸ್ತಾಯ್ಕಿ ಒದಗ್ಸುನ್ ದಿಲಿ.

ತೋಕುರಾಂತ್ ಕೊಪೆಲ್ ಜಾಲ್ಲ್ಯಾ ಉಪ್ರಾಂತ್ ತೋಕುರ್ಚೊ ಲೋಕ್ ಪೆಜಾರ್ ಫಿರ್ಗಜೆ ಥಾವ್ನ್ ವಿಂಗಡ್ ಮ್ಹಣ್ ಚಲೊನ್ ಆಯಿಲ್ಲ್ಯಾ ವರ್ವಿಂ ಹಿ ಸ್ಥಿತಿ ಪೆಜಾರ್ ವಿಗಾರಾನ್ ಗೊವ್ಳಿ ಬಾಪಾಂಕ್ ತಿಳ್ಸುನ್ ತೋಕುರ್ ಕೊಪೆಲಾಕ್ ಏಕ್ ಖಾಜಿತೊರ್ ದೀಂವ್ಕ್ ಉಪ್ಕಾರ್ ಮಾಗ್ಲೊ. ಖಾಜಿತೊರ್ ದೀಂವ್ಕ್ ಸಾದ್ ಜಾವ್ನಾ ದೆಕುನ್ ಕೊಡಿಯಾಲ್ ಬೈಲ್ ಪ್ರೆಸಾಚೊ ಮ್ಯಾನೆಜರ್ ಬಾಪ್ ತೋಮಾಸಾಕ್ ಥೊಡ್ಯಾ ಮಹಿನ್ಯಾಂಕ್ ಮೀಸ್ ಬೆಟಂವ್ಕ್ ನಮಿಯಾರ್ಲೊ. ಸಂದ್ರಾಪ್ ನಾತ್ಲೆ ವೆಳಿ ಗೊವ್ಳಿ ಬಾಪಾನಿಂ ಬಾಪ್ ವಿಕ್ಟರ್ ಮಚಾದೊಕ್ ಕುಮೊಕ್ ಕರುಂಕ್ ದಾಡ್ಲೆ. ಕುಡಿಚ್ಯೊ ಗರ್ಜೊ ತಿರ್ಸುಂಕ್ ಶೌಚಾಲಯ್ ಬಾಂದ್ ಲ್ಲೆ ಹ್ಯಾಚ್ ವೆಳಾ. ತೋಕುರಾಂತ್ ಸಿಮಿಸ್ತ್ರ್ ನಾತ್ಲೆ ವರ್ವಿಂ ಸರ್ಕಾರಾನ್ 1.08 ಎಕ್ರೊ ಜಾಗೊ 2-11-1992 ವೆರ್ ಮಂಜೂರ್ ಕರ್ನ್ 8 ಪೀಟ್ ಉಬಾರಾಯೆಚೊ ದೊರೊ ಘಾಲ್ನ್  ಧರ್ಮಾರ್ಥ್ ದಿಲೊ. ತೋಕುರಾಂತ್ ಫಿರ್ಗಜ್ ಸ್ಥಾಪನ್ ಕರುಂಕ್ ಪೆಜಾರ್ ಪಿರ್ಗಜೆಚ್ಯಾ ಗೊವ್ಳಿಕ್ ಮಂಡಳಿನ್ ನಿರ್ಧಾರ್ ಘೆತ್ಲೊ. ಪಯ್ಲ್ಯಾ ಸುವಾತೆರ್ ವಿಗಾರಾಕ್ ರಾವೊಂಕ್ ಘರ್ ಬಾಂದವ್ಚೆ ನಿರ್ದಾರ್ ಕೆಲೊ ಆನಿ 1997 ಎಪ್ರಿಲ್ ಮಹಿನ್ಯಾಂತ್ ಹೆಂ ಕಾಮ್ ಪ್ರಾರಂಭ್ ಕೆಲೆಂ. ಬಾಪ್ ಮೌರಿಸ್ ಸೋಜ್ ಪೆಜಾರ್ ಫಿರ್ಗಜೆಂತ್ 7 ವರ್ಸಾಂ ಸೆವಾ ದೀವ್ನ್ 7-5-1997 ವೆರ್ ಕೂಳೂರ್ ಫಿರ್ಗಜೆಕ್ ವರ್ಗ್ ಜಾವ್ನ್ ಗೆಲೆ ಆನಿಂ ತಾಂಚ್ಯಾ ಜಾಗ್ಯಾರ್ ಬಾಪ್ ಸಿರಿಲ್ ಪಿಂಟೊ ಬಾಪಾನಿಂ ಪೆಜಾರ್ ಫಿರ್ಗಜ್ ವಿಗಾರ್ ಜಾವ್ನ್ ಜವಬ್ದಾರಿ ಘೆತ್ಲಿ ಆನಿಂ ತೋಕುರಾಂತ್ ಫಿರ್ಗಜ್ ಜಾಂವ್ಕ್ ಚಡ್ ಮಿನತ್ ಘೆತ್ಲಿ. ತೋಕುರ್ ತಶೆಂಚ್ ಪೆಜಾರ್  ಫಿರ್ಗಜೆಚ್ಯಾ  ಕುಟ್ಮಾನಿಂ ವಿಗಾರಾಚೆ ಘರ್ ಬಾಂದುಕ್ ದಾನ್ ದಿಲೆಂ ಘರಾಚೆ ಕಾಮ್ ಜಾವ್ನ್ ಆಸ್ತಾನಾಚ್ ಫಿರ್ಗಜ್ ಸ್ಥಾಪನ್ ಕರ್ಚ್ಯೋ ಸರ್ವ್ ರಿತಿ ರಿವಾಜ್ಯೊ ಸಂಪಯ್ಲ್ಯೊ. ಪೆಜಾರ್ ಫಿರ್ಗಜ್ ವಿಗಾರ್ ತಶೆಂಚ್ ಗೊವ್ಳಿಕ್ ಪರಿಷದ್ ನಿರ್ದಾರಾಕ್ ಸರಿ ಜಾವ್ನ್ ದಿಯೆಸೆಜಿಚ್ಯಾ ಸೆನೆಟ್ ಸಭೆಚ್ಯಾ ಶಿಫಾರಸೆ ಪರ್ಮಾಣೆಂ ಗೊವ್ಳಿ ಬಾಪಾನಿಂ ಮಾ| ಬಾ| ವಾಲ್ಟರ್ ಡಿಮೆಲ್ಲೊ ಆನಿಂ ಮಾನಾದಿಕ್ ಬಾಪ್ ತಿಯಾದೂರ್ ಡಿಸೋಜಾ ಸಾಂದೆ ಜಾವ್ನಾಸ್ಚಿ ಏಕ್ ಸಮಿತಿ ರಚುನ್ ತೋಕುರ್ ಫಿರ್ಗಜೆಚ್ಯಾ ಆನಿಂ ಗೊವ್ಳಿಕ್ ಮಂಡಳೆಚ್ಯಾ ಶಿಪಾರಸೆ ಪರ್ಮಾಣೆಂ ಮಂಗ್ಳುರ್ ದಿಯೆಸೆಜಿಚ್ಯಾ ಗೊವ್ಳಿ ಬಾಪಾನಿಂ ತೋಕುರಾಂತ್ ಫಿರ್ಗಜ್ ಸ್ಥಾಪನ್ ಕರ್ಚ್ಯಾಕ್ 23.04.2000ವೆರ್ ಆದೇಶ್ ದಿಲೊ ಆನಿ ಹ್ಯಾ ಡಿಕ್ರೆ ಪರ್ಮಾಣೆಂ 28-05-2000ವೆರ್ ಸಾಂತ್ ಸೆಬೆಸ್ತ್ಯಾಂವಾಂಕ್ ಸಮರ್ಪುನ್ ದಿಲ್ಲಿ ಫಿರ್ಗಜ್ ಸ್ಥಾಪನ್ ಕರ್ನ್ ಮಾ| ಬಾ| ಫ್ರಾನ್ಸಿಸ್ ಡಿಸೋಜಾ ಹಾಂಕಾ ಪಾರೋಕಿಯಲ್ ಆಡಳ್ತೆದಾರ್ ಜಾವ್ನ್ ನಮಿಯಾರ್ಲೊ. ಗೊವ್ಳಿ ಬಾಪ್ ಅದಿಕ್ ಮಾನಾದಿಕ್ ದೊತೊರ್ ಅಲೋಶಿಯಸ್ ಪಾವ್ಲ್ ಸೋಜಾನ್  ವಿಗಾರ್ ಬಾಪಾಂಚೆಂ ಘರ್ ಆಶಿರ್ವಚನ್ ತಶೆಂಚ್ ಫಿರ್ಗಜ್ ಉದ್ಘಾಟನ್ ಕರ್ನ್ ಮಿಸಾಚೆಂ ಬಲಿದಾನ್ ಬೆಟಯ್ಲೆಂ ತಶೆಂಚ್  ಸಿಮಿಸ್ತ್ರೆಚ್ಯಾ  ಜಾಗ್ಯಾಚೆ ಆಶಿರ್ವಚನ್ ಹ್ಯಾಚ್‌ ವೆಳಾರ್ ಕೆಲೆಂ. 28-05-2000 ಹೊ ದೀಸ್ ತೋಕುರ್ ತಶೆಂಚ್ ಕೆಂಜಾರ್ ಗ್ರಾಮಾಚ್ಯಾ ಲೋಕಾಂಕ್ ವರ್ತ್ಯಾ ಸಂತೊಸಾಚೊ ದೀಸ್ ಜಾವ್ನಾಸೊನ್ ಸಬಾರ್ ವರ್ಸಾಂ ಥಾವ್ನ್ ಕೆಲ್ಲಿ ತಯಾರಾಯ್ ಪೊಂತಾಕ್ ಪಾವ್ ಲ್ಲೊ ದೀಸ್ ಜಾವ್ನಾಸಾ.